Ubåtvraket U-864 med 70 tonn kvikksølv representerer alvorleg fare for miljøet.

Det er med sterk uro Fedje Arbeiderparti ser at Kystdirektoratet rår til å dekka til kvikksølvet på havbotnen i staden for å ta det opp.

Det er vanskeleg å skjøna at vi med den avanserte undervassteknologien og dei store økonomiske ressursane Noreg har, ikkje skal kunne ta opp og fjerna kvikksølvgifta frå havet. Av rapporten om saka går det fram at ein av verdas fremste ekspertar på hevingsarbeid slår fast at vraket og innhaldet kan fjernast innanfor akseptable grenser for risiko.

Kystverket viser til om lag 30 døme på tildekking av kvikksølvforurensa havbotn i løpet av dei siste 20 åra – og peikar på at det ikkje er teikn på at tiltaka har svikta. Fedje Arbeiderparti kan ikkje akseptera at røynsler som er gjort over så kort tid vert brukt som eit argument for eit tiltak som må vara evig. Det verkar og særs underleg at konsekvensane av moglege jordskjelv i området ikkje er er utgreidde. Dette er særleg vanskeleg å skjøna når Kystdirektoratet slår fast at havbotnen der vraket av U-864 ligg, er svært ustabil.

Fedje Arbeiderparti vil understreka at Regjeringa i si vurdering av saka ikkje berre må ta med dei reint tekniske risikomomenta. Ei tildekking vil innebera tvil og uro for at tiltaket ikkje vil tåla tidens tann. Det ligg i saka at tvilen ikkje vert mindre med åra. Metoden som vert vald må og vera slik at det internasjonale samfunnet har ein absolutt tillit til at det held mål. Berre eit snev av tvil vil kunne få store konsekvensar for Noreg som fiskerinasjon og eksportør av sjømat.

Vi som bur i dette området vil ikkje ha denne nagande tvilen. Vi ønskjer at barna våre og i framtida skal kunne bu trygt ved sjøen og hausta av eit reint hav.